adolokin ngon loelaunit lo iboei koicolongo, ekoto etunganan aica naka
emoyo loka Edeke ka ailongario naka Okoku Ke.
Kobu Yokana kowanyu iboro iwongon luka ajarak irimorito eicolongo.
Iboro nu kajarak karaparitos akonyen ngaren ka kau. Kobu Esekiel
kowanyunite iboro kwape kalu (Esekiel 1). Kangin iboro kanu iwongon
kajatotor keda erete lokegelekina. Losodit kaputos ka engatuny. Lokiareit
kaputos ka emongo. Lokiuniet kaputos ka etunganan. Lokiwongonete
kaputos ka emorukaalet. Kajaas iboro nu kere keda abebenuka akanyikape
kangin diope. Karaas iboro nu kasubitos bala imalaikan. Kingarenikitos
imakio kotoma aima. Kasubit nabala akes aswamu cut (kowanyu
Apukokinio 7:11; 14:3; 19:4).
Epu inerisinei nu ejaas toma oboro nu iwongon nuegelegela ereeta kes.
Itodunit na ebe ebwoikinitos iboro nuepolok kotoma aisubu naka Edeke.
Engatunyu kwape ekabaka loka itiangi luka aisuu, ejena nges kotoma
agogongu ke. Emongo kwape, ekabaka loka iboro nupitan kore, ejena nges
kanu akeswam kagogongu. Etunganan, kwape loepolokit asubio, ejena nges
kanu ake acoa. Angetakin, emorukaalet, kwape ekabaka loka ikwengi, ejena
nges kanu esipidi ke. Kerai na angajepe nakapedori ekiyakia Yokana
ajenun. Iboro nukajarete nu, karaida mamu kes kaputosi keda kanu kiboete
koicolongo, kabwoikinitos isuban luka Edeke kere luejarete.
Kwape sek kilimunitor oni, ebe, iboro nu kajaas keda akes aswam na
aingarenikin kotoma aima. Apaaran ka akware kamonyete kes:
"Lokalaunan, lokalaunan, lokalauna Ejakait Edeke lokapedor kere, Lokajai,
ido loejai, ido loebuni da" (Apukokinio 4:8).
Neducu ijaikinata iboro nuejarete nu iwongon aibuses nejai ngon loiboei
koicolongo, imakio akaisarei kaluwongon kalu irerete kwap kotoma
kosodete aima. Kibwaikinete imakio abokoi kes ngaren kangol kalo kiboei
koicolongo kwape awanyunete naka ayongite ka anonokikinit komonyete
ebe:
‘’Ibusakinit ijo, Ejakaitikosi ka Edekekosi da, Adumun aibuses,
ka ayongio, ka apedor, Naarai ibu ijo kosub iboro kere, Ijo